Pune News|पुण्यातील ‘या’ भागात सजावट साहित्याच्या गोदामात आग

पुणे : दिवाळीत ६० ठिकाणी आग लागण्याच्या घटना घडल्या. बहुतांश ठिकाणी फटाक्यांमुळे आग लागण्याच्या घटना घडल्या आहेत. सुदैवाने आगीच्या घटनांमध्ये कोणी गंभीर जखमी झाले नाही. अशातचं आता पुण्यातील सिंहगड रस्त्यावरील हिंगणे खुर्द भागात सजावट साहित्याच्या गोदामाला सोमवारी सायंकाळी आग लागली. अग्निशमन दलाच्या जवानांनी अर्ध्या तासात आग आटोक्यात आणली. रहिवासी भागात गोदाम असल्याने आटोक्यात आणताना अडथळे आले. सुदैवाने या घटनेत कोणी जखमी झाली नाही.

सिंहगड रस्त्यावरील हिंगणे खुर्द परिसरात बेंद्रे इव्हेंट मॅनजमेंटचे गोदाम आहे. या गोदामात मोठ्या प्रमाणावर सजावट साहित्य ठेवण्यात आले आहे. गोदामाची जागा जगताप यांच्या मालकीची असून, गोदामाच्या परिसरात दाट वस्ती आहे. सोमवारी सायंकाळी पावणेसातच्या सुमारास गोदामातून माेठ्या प्रमाणावर धूर येत असल्याची माहिती रहिवाशांनी अग्निशमन दलाला कळविली. गोदामातील गालिचे, सजावट साहित्याने काही क्षणात पेट घेतला. या घटनेची माहिती मिळताच सिंहगड रस्ता अग्निशमन केंद्राचे प्रमुख प्रभाकर उमराटकर, नवले पूल अग्निशमन केंद्राचे प्रमुख प्रकाश गाेरे, वाररजे अग्निशमन केंद्राचे प्रमुख सचिन मांडवकर यांच्यासह जवानांनी घटनास्थळी धाव घेतली. गोदामातील साहित्याने पेट घेतल्याने मोठ्या प्रमाणावर धूर झाला होता. गोदामाच्या परिसरात रहिवासी भाग आहे.

चिंचोळ्या गल्लीतून मार्ग काढून जवानांनी पाण्याचा मारा करुन अर्ध्या तासात आग आटोक्यात आणली. जवानांनी गोदामाची पाहणी केली. गोदामात कोणी अडकले नसल्याचे उघडकीस आले. गोदामातील सजावट साहित्य जळून भस्मसात झाले. सुदैवाने या घटनेत कोणी जखमी झाले नाही. आगीमागचे निश्चित कारण समजू शकले नाही, अशी माहिती अग्निशमन दलाचे केंद्र प्रमुख प्रभाकर उमराटकर यांनी दिली.

संपादक – आरतीताई बाबर 8830914142
उपसंपादक – अकबरजी शिकलकर 8625870039