दहीहंडीमुळे पुण्यात वाहतुकीत बदल; ‘या’ पर्यायी मार्गाचा करा वापर

पुणे : मंगळवारी विविध भागात दहीहंडी उत्सव मोठ्या उत्साहात साजरा करण्यात येणार आहे. यानिमित्ताने पुणे पोलिसांनी चोख खबरदारी घेतली असून, पुणे शहरातील मध्यभागातील वाहतूकीत बदल करण्यात आला आहे. वाहन चालकांना पर्यायी मार्ग उपलब्ध करून देण्यात आले आहेत. या मार्गांचा वापर करावा, असे आवाहन पुणे पोलिसांनी केले आहे.

दहीहंडीनिमित्त छत्रपती शिवाजी रस्ता, महात्मा फुले मंडई, हुतात्मा बाबू गेणू चौक, अप्पा बळवंत चौक, टिळक रस्त्यावरील साहित्य परिषद चौक, नवी पेठेत मोठी गर्दी होते. मंगळवारी सायंकाळी पाचनंतर दहीहंडी फुटेपर्यंत या भागातील वाहतूक व्यवस्थेत बदल करण्यात येणार आहेत. गर्दी वाढल्यानंतर छत्रपती शिवाजी रस्ता, टिळक रस्ता, लक्ष्मी रस्ता, बाजीराव रस्ता वाहतुकीस बंद ठेवण्यात येणार आहे. या भागातील वाहतूक पर्यायी मार्गाने वळविण्यात येणार आहे, असे वाहतूक शाखेचे पोलीस उपायुक्त अमोल झेंडे यांनी सांगितले.

दहीहंडीनिमित्त हे रस्ते बंद राहणार

मंडईतील रामेश्वर चौक ते शनिपार चौक
लक्ष्मी रस्त्यावरील सोन्या मारुती चौक ते सेवा सदन चौक
छत्रपती शिवाजी रस्त्यावरील लालमहाल चौक ते गोटीराम भैय्या चौक, मंडई
दारुवाला पूल चौक ते गणेश रस्ता लाल महाल चौक

या पर्यायी मार्गाचा वापर करावा

छत्रपती शिवाजी रस्त्याने स्वारगेटकडे जाणाऱ्या वाहनांनी स. गो. बर्वे चौकातून जंगली महाराज रस्ता, खंडुजीबाबा चौकमार्गे इच्छितस्थळी जावे. टिळक रस्त्यावरील पूरम चौकातून बाजीराव रस्त्याने शिवाजीनगरकडे जाणाऱ्या वाहनांनी टिळक रस्तामार्गे इच्छितस्थळी जावे. स. गाे. बर्वे चौकातू महापालिका भवनकडे जाणाऱ्या वाहनांनी स. गो. बर्वे चौकातून जंगली महाराज रस्ता, झाशीची राणी चौकमार्गे महापालिका भवनकडे जावे. बुधवार चौकातून अप्पा बळवंत चौकाकडे जाणारी वाहतूक एकेरी करण्यात येमार आहे. अप्पा बळवंत चौकातून बुधवार चौकाकडे जाणाऱ्या वाहनांना प्रवेश बंद करण्यात येणार आहे. अप्पा बळवंत चौकातून बाजीराव रस्त्याने वाहनचालकांनी इच्छितस्थळी जावे.

जन हक्क टाइम्स पुणे
वार्ताहर :- अकबर शिकलकर